إنه حقا... مختلف

في يوم كنت بتفرج على فيلم في التليفزيون

الفيلم اسمه 5th element بتاع بروس ويلز 

الفيلم لا يخلو من الإبهار البصري والأمركة والهيافة... بس الفيلم ده اثر فيا ولسه فاكراه عشان حاجة واحدة بس

مغنية الأوبرا الفضائية.. اللي فعلا صوتها تحس انه من كوكب تاني وتصدقها بجد

 خطفت قلبي وعقلي وفضلت فاكراها وفاكرة الفيلم لحد ما شفته تاني بعدها بسنتين

صعب تصدقوا اني شفت فيلم وقعدت مستنياه ييجي تاني لمدة سنتين كاملتين.. لكن ده اللي حصل

بس في المرة التانية قلت لازم اوصلها

شكرا لليوتيوب اللي سهلي حياتي

واللي عرفني ان مغنية الاوبرا دي.... واحد راجل

اسمه Vitas

روسي الجنسية

صوته ... مش عارفه اوصفه

بس بجد حالة مختلفة

اول فيديو شفتهوله بعد كده كان بيغني Avi Maria

بعيدا عن اني بحب الاغنية دى جدا لكن بصوته حولها لصلاة ملائكية مالهاش وصف

بعدها.. ممكن تتوقعوا انا عملت ايه

بقيت زي المدمن اللي بيدور على جرعة من المخدر بتاعه

وكان مخدري هو Vitas

انا واحدة بقدر الفن جدا.. وبقدر يعني ايه بنى ادم ممكن يتنقل بصوته بين الطبقات بنعومة واحترافية وسرعة من غير ولا غلطة

فيه ناس ممكن تكون شايفه انه شخص بيصوت وخلاص

بس اعتقد ان هو كده.. يا تعشقه بجنون... ياماتفهموش وبالتالي تكرهه بجنون :)

معلومة كمان عرفتها عنه... والفضل يرجع لصديقتي الروسية تاتيانا اللي قابلتها في لبنان

vitas  من اشهر المغنيين في روسيا.. زي فيروز كده في لبنان لا يختلف عليه اتنين

دا غير انه قديم كده ومن زمان زي محمد منير عندنا كده

تاتيانا وعدتني انها هاتبعتلي احدث البوماته من سنتين تقريبا وبعد كده اختفت.. لما شوفها بس :@

ولحد ما اعرف عنها حاجة.. هافضل برضه ادور على اى فيديوهات ومعلومات عنه.. واسيب نفسي وروحي لصوته بكل قوته ونقائه

شكرا Vitas

You're Simply the BEST

 دا فيديو Avi Maria

ودي نفس أغنيته اللي عرفته منها في فيلم 5th element... بس بجد بقى

رسائل إلى حبيبي - 2

حبيبي... أخبارك ايه النهارده؟

أخيرا انفتحت أبواب السماء ونزل المطر

عارف يعني ايه المطر ينزل؟

يعني أجمل لسعة برد بحس بيها على خدودي.. واجمل نسمة هوا نضيفة بحسها جوا صدري

هو أنا قلتلك قبل كده اني بحب الشتا قوي؟

حتى لو ماقلتلكش أكيد انت عارف.. ماحنا الاتنين بنحب نفس الحاجات

من قبل ما اقابلك وانا كنت بتمنى اني لما اقابلك نمشي سوا تحت المطر واحنا ماسكين ايدين بعض

ولما المطر يبقى شديد نجري ونصوت بعلو صوتنا ونقول ياهووووووووووووووو

هيييييييييييييييييه

ونضحك من قلوبنا زي الاطفال.. أو احنا بجد اطفال كبار

ماينفعش المطر ييجي من غير ما افتكرك وابتسم

والاهم من دا كله.. بارفع ايدي للسما وبدعي بكل حاجة نفسنا فيها

خلي بالك لحسن يجيلك برد.. انا عارفاك ما بتستحملش وبتعاند نفسك

أصلك في دي برضه زيي تمام :)

تصبح على خير

رسائل إلى حبيبي

حبيبي.. وحشتني قوي

انا عارفه ان مافاتش على فراقنا اكتر من يومين.. لكن بجد غيابك مأثر فيا فوق ما تتصور

احساس بالفراغ .. والوحدة.. وغربة مالهاش حدود فى عالم واسع بقيت بحس بالوحشة فيه

معقول للدرجادي اتعودت انك تكون في حياتي؟.. معقول أكون وصلت للدرجة دي من الإدمان؟

انا عارفه ان فراقنا كان غصب عننا.. بلدنا احتاجتك تخدمها بعلمك وبسلاحك.. ومافيش غير اننا نقول السمع والطاعة.. بقلوبنا قبل لساننا

ياترى عامل ايه؟.. ياترى بتفكر فيا زي ما بفكر فيك؟

وحشتك زي ما انت واحشني قوي كده؟

بادعيلك في كل صلاة ان ربنا يوفقك ويكون جنبك وينورلك طريقك.. ويصبرني على بعادك

ياترى هل لما كنت انا اللي ببعد وبسافر كنت بتحس نفس اللي انا حاسه بيه دلوقتي؟

دانت على كده بطل في الصبر :)

احب اطمنك عليا.. أنا كويسة الحمد لله وبخير.. الواحد دايما متعود انه يقول الحمد لله في السراء والضراء.. او جايز عشان لسانه أخد على الكلمة مش اكتر :)

ما تخافش عليا.. انت عارف حبيبتك صلبة وقوية وتهزم 100 عفريت.. وكل صعب في حياتي هايهون إن شاء الله.. 

خلي بالك من نفسك.. اتعلم واستفيد من كل لحظة بتعدي عليك.. ولما اوحشك قوي.. افتكر اني دايما جنبك على طول

بحبك قوي

خبر في اللذيذ

باستخدام مرصد هيرشل الفضائي؛ اكتشف علماء الفلك لأول مرة وجود بخار ماء بارد يغلف قرص ترابي محيط بنجم حديث الولادة!!! ويعتقد العلماء ان هذا التكوين سيكون نواة لنشوء نظام شمسي جديد. ومع توافر كميات مهولة من المياه، سيكون وجود كواكب مثل الارض شيئا شائع الوجود في الكون. هيرشل هي وكالة فضائية أوروبية على صلة وثيقة بوكالة ناسا الامريكية.

دا عنوان خبر موجود على موقع ناسا بتاريخ امبارح.. طبعا الموضوع يهبل مش كده :) الموضوع طويل ومكعبل وترجمته مش هاتبقى ظريفة فانا هاتطوع واقلكوا الخلاصة

طبعا لازم اسيب بصمتي على كل كلمة تتقال.. فانا هاحط تعليقاتي الشخصية بلون مختلف

أولا: موضوع تواجد بخار المياه او التلج فى الفضاء دا موجود من فترة طويلة.. في المذنبات اللي بتسافر حوالين المجموعة الشمسية وف كل حتة تانية.. جزء اساسي من تكوينها بخار المياه اللى تحول لتلج اختلط بالغبار.. حتى العلماء بيوصفوا المذنب بـ" كرة الثلج القذرة اللي عندها ذيلين.. واحد ناتج من الأتربة اللي ماليه المذنب والتاني عبارة عن عناصر متاينة".. طبعا مش هاطلعكوا بره الموضوع عشان نمسك فى الحاج مذنب ده.. خلينا فى اللى احنا فيه. المهم.. المذنبات دي لما بتخبط في اي كوكب غلبان - برغم انها ممكن تدمره - لكنها هاتديله شوية مياه من اللي عندها.

تانيا: نيجي للبتاع اللي احنا اكتشفناه ده.. العلماء وهما بيراقبوا النجم وحواليه القرص الترابي اللي مليان تلج وبخار مياه لقوا ان كمية المياه اللي فيه ممكن تملا آلاف المحيطات الارضية.. يااااااه.. دى الدنيا غرقانه عندهم قوي بالشكل ده.. كويس والله عشان لما تحصل عندنا ازمة مياه نروح نرمي جردلين فوق ونجيب حبة من هناك.. وساعتها مش هايبقى فيه حروب على المياة.. أقترح اننا نوسوس لإسرائيل بالفكرة دي عشان تسيب موارد المياة فى الوطن العربي والنيل والفرات في حالهم.

تالتا: النجمة اللي اكتشفوها دي اسمها TW Hydrae، وعندها عشرة مليون سنة بس - لسه نونو يعني :) - وتبعد عن الارض حوالي 175 سنة ضوئية في المجموعة النجمية هيدرا- لا والله طلعت قريبة قوي.. نروح نصيف هناك بقى-

رابعا: كان مكتوب في الخبر انهم لقوا بخار ماء بارد وتلج.. دا بسبب ان النجم بيطلع أشعة فوق بنفسجية بيخبط في ذرات التلج اللي ماليه القرص الترابي ده.. بتديها طاقة وبتحرر بعض الذرات منها وتخليها تتبخر وتعمل طبقة رقيقة من بخار المياه على قرص التراب والتلج الاصلي.

خامسا: النجم هيدرا ده نجم برتقالي حرارته ضعيفة مقارنة بحرارة شمسنا الحلوة الصفراء.. وكمان حجمه أصغر منها - غلبان غلبان يعني - والمسافة مابين القرص الترابي ده والنجم نفسه قد المسافة بين الارض والشمس 200 مرة - باعتبار ان المسافة بين الأرض والشمس تقريبا 150 مليون كيلومتر.. يعنى المسافة بين النجمة دى والقرص حوالي.... يالهوي.. دا كتيييييييييير قوي، له حق يبقى عصر جليدي هناك- والعلماء بيعتقدوا انه كمان كام مليون سنة كده الجزيئات والذرات بتاعت القرص ده هاتتجمع مع بعضها وتندمج وتعمل كواكب زى ماحصل مع المجموعة الشمسية من كام مليار سنة كدة.

سادسا: ان شاء الله المذنبات اللي هاتتكون مع المجموعة الجديدة دى هاتبقى مليانه مياه هاتعملها ديليفري لأي مكان هاتسافرله بعد كده.. سعر المنتج ثابت .. سعر الشحن ثابت أينما كنت.

دي صورة تخيلية للنجم TW Hydrae وحواليه القرص الترابي والتلج وطبقة بخار الماء

اللي عاوز يقرا الخبر الاصلي من موقع وكالة ناسا الفضائية كمقال علمي بجد بقى بعيدا عن التهييس بتاعي

يا دبلة الخطوبة... عقبالكو كلكو :)

أنا زعلانة مني
أنا زعلانه عليا
أنا بحبني قوي
وعايزه استقوى بيا
مش عايزه اقول في يوم
الدنيا لطشت فيا
أو انا عايشه طول عمري منسية
دا الاحسن اني اقول
قهرت الصعب بإيديا
كل حاجه حبيتها ف يوم
وقضيت عمري اتمناها ليا
لقيتها بتجري بتتسحب بتتسرسب من بين ايديا
وكل حاجه هربت منها رفضتها كرهتها
كنت بارفسها برجليا
لقيتها تاني يوم أملي الوحيد وفيها عيشتي الهنية
بتعدي عليا اوقات باكره الغباء فيا
او ايام صعبة كئيبة بتكسر فيا
ولقيتني بقيت بحب اعيش جوا الحزن
أشوف اهاتي مسلية
بس ارجع وافوق م الهم
واقول الدور ده مش ليا
نفسي أرجع زي ما كنت
الفرحة والضحكة عنوان ليا
امتى بس انا هافهم نفسي
واعرف انا انهي شخصية

*** أنا عاوزه أرجع تاني بقااااااااااااااااااااا***

مطلوب وظيفة.. جـ 2

عملت اختبار تقييم وظيفي من سنتين تقريبا

وعملت اختبار تقييم وظيفي تاني غيره النهارده

الاتنين ادوني نفس النتيجة وهو اني شخصية ASR

Artistic - Social - Realistic

يعني شخصيتي فنية - اجتماعية - يدوية

بحب الشغل اللي ليه علاقة بالفن بالدرجة الأولى.. ثم الشغل - او معاه - اللي بيتعامل مع المجتمع او بيعتمد على العلاقات الاجتماعية

ويليه الأعمال اليدوية (زي النحت وكده يعني مش شغل البيت)

وأكتر حاجة لقيت انها مش في شخصيتي هو اني مش Convential

يعنى مش روتينية ومش بحب الأعمال الروتينية او المكتبية

وقبلها على طول Enterprising

يعني م الآخر انا فاشله اني أعرف أطلع مصلحة او فلوس من أي حاجه ( دي مش حاجه وحشة ولا حلوة.. دي خبرة معينة مش في شخصيتي.. مش زي البنات المتودكين اللي يعرفوا يطلعوا القرش ويحافظوا عليه.. اه ياني يامه)

وتيجي قبلهم بقى.. أو بعد قائمة اهتماماتي الأساسية Investigative

يعني ماليش قوي في البحث والتحليل والتدقيق ( مش هابقى المحقق كونان يعني)

دا يخليني طبعا أتحسر على حالي وحال ناس كتيرة اللي بيشتغلبوا في حاجات، مش هاقول مالهمش علاقة بيها ، لكن كمان ما بيحبوهاش ومش فى شخصيتهم اصلا

التقييم ده بيتعمل لأي حد في اي دولة محترمة عشان يعرفوا ميول الشخص ايه وعلى اساسه بيتحط في مكانه المناسب عشان يعطي أفضل انتاجية .. لكن هنا بيتفننوا انهم يقتلوا كل احساس عند الناس .. بيتقال عليهم مجرد موظفين وبياخدوا مرتب اخر كل شهر عشان يلفوا بيه الساقية وشكرا على كده

في لحظة صراحة كده مع نفسي سالتني.. ياترى انا عاوزه أشتغل ايه؟؟

عاوزه أشتغل في حاجه ليها علاقة بالفن

بحب الموسيقى والألوان

بحب وقفتي على المسرح.. وحرب الألوان اللي بتبهدلي هدومي وترسم ضحكة جوا قلبي

بحب أمسك أراجوز صغنون وأقعد أستهبل بيه مع الاطفال الصغيرين - والكبار كمان - واخترع قصص وحواديت وانا واقفه

بحب أقلد اصوات الكارتون وأغني اغانيهم

بحب أمسك ورق ومقص وشوية ألوان أطلع منهم تحفة فنية.. جايز مالهاش معالم معينة بس شكلها يبهج

بحب أشخبط على الحيطان وادهن بوية وارسم ورد وشمس ومركب

بحب أخد نفس عميق وانبهر باجمل مناظر طبيعية خلقها ربنا أو أحلى بيوت قديمة وعمارة عملها البشر .. بجمال الشجر والحجر وأسجلهم على ذاكرة الكاميرا بتاعتي

بحب أسافر في كل مكان وأي مكان.. من غير تخطيط او ترتيب.. المهم يكون مكان جديد أشوفه عن قرب واعرفه واعيش تجربة الحياة فيه

بحب ضحكة الأطفال وابتسامة السعادة على وجوههم لما ننتج حاجه جميلة بإيدينا مع بعض واحس بنفس الفخر اللي هما حاسين بيه لما أهاليهم يحبوا اللي احنا عملناه

بحب أقرب من إبداع ربنا في الكون.. ومن إبداع الانسان على الارض .. انفعل بيه من جوايا واترجمه لكل الناس عشان هما كمان يشاركونى التجربة ويفرحوا باللي مفرحني

بحب انى اتقدم واتحرك واجرب واجري وأتشنكل واقع على وشي واقوم تاني انفض نفسي واضحك واكمل

عاوزه الحرية.. الجمال.. المرح.. السعادة.. الطموح.. الخبرة

ومش هاقول عاوزه الفلوس.. لأني عشان احقق كل ده لازم يبقى معايا الفلوس

الفلوس بالنسبالي البنزين اللي هايطير صاروخي في فضاء أحلامي

ومعاه العلاقات والاتصالات والمعارف

والاهم من دا كله.. الثقة بالنفس.. والثقة في طريقي وف قدرتي انى اعمل ده وفي خطتي عشانه

والصبر وطول الباااااااااااااااااااااااااال

وقبل كل ده.. الثقة في ربنا.. انه ما خلقنيش بالشكل ده وجوايا الروح دي عشان يسيبنى من غير ما يكون موجود عشاني الشيء المناسب بالنسبالي

ولو الشيء ده مش موجود ربنا يوفقني للي يقدر يدلني عليه.. او يديني القدرة اني ألاقيه.. او حتى أعمله بنفسي من اول وجديد

واهو نبقى كسبنا مكان على لوحة التاريخ :)

ها.. حد عنده بقى وظيفة تناسبني؟؟

مطلوب وظيفة

أنا بادور على وظيفة
تكون مواعيدها متلائمة مع أوقات دراستي
تكون مرنة وتسمحلي اني أحضر بروفات فرقتي وحفلاتي وأحيانا سفري
مش هاقول عاوزاها جنب البيت.. لكن مش عاوزه أضيع نص يومي في المواصلات
مش مهم نوعية الشغل إيه.. المهم انه يكون متنوع ومحتاج أفكار وإبداع مش روتيني ممل يخنقني.. حتى لو الكم كبير
عاوزه شغل اتعلم منه جديد ويضيفلي زي ما أضيفله.. واخد فترة تدريب كافية ليه
عاوزه وظيفة تسدلي احتياجاتي المادية من مصروفات دراسية ومواصلات وأدوية وأنشطة وجمعيات..حاجة توفر الأمان المادي لواحدة اعتمدت على نفسها من مدة طويلة وعيب قوي بعد العمر ده تتاقل على حد يصرف عليها.. حتى لو مش هايتبقالي منها حاجة للزمن
عاوزه وظيفة.. يكون اللي بيشتغلوا معايا فيها عارفين أبسط حقوق الانسان وقوانين العمل
يتقوا الله فيا ويساعدوني اني اتطور من غير استغلال لمجهودي أو أدميتي او وقتي او اعصابي
تفتكروا الطلبات اللي انا طالباها دي فيها شيء من الخيال العلمي؟؟؟
قولوا .. قولوا ما تتكسفوش
أصل المعاملة الآدمية ومراعاة ابسط حقوق الانسان بقت هبل بعيد عنكو في دولتنا الحلوة دي
الكلام اللي انا باقوله ده هو ابسط حاجة هاتلاقوها في اي دولة محترمة بتراعي البني ادمين وشايفة انهم طاقة منتجة وراس مال قومي للبلد
الحكومة بتشوف مؤهلاتك وكفاءاتك وانت هاتكون احسن فى اى مكان وتفصلك وظيفة على مقاسك
عشان عارفه ازاي تستثمر كل حاجه تحت ايديها بما فيهم البني ادمين

جايز تقولوا عليا هبلة او مجنونة.. لكن انا لحد دلوقتي فى كامل قوايا العقلية.. حتى لو مش ضامنه نفسى كمان شوية اذا كنت هافضل زي مانا ولا هالبس الكسارولة على دماغي قريب

خلاصة الموضوع.. ايه رايكم في واحدة.. بتشتغل بشكل متواصل من 7:30 لحد الساعة 4:30
المسافة بين الشغل وبيتي بالضبط 3 ساعات رايح وزيهم جاي بالعربية.. يعني اسكندرية أقربلي
المرتب المتفق عليه لا يخضع لأي قوانين او اعتبارات او معايير إلا بدماغ اللي حددته
ليها مزاج تخصم غياب اليوم بثلاثة ايام في اى وقت في السنة ماحدش هايقدر يناقشها
شايفه ان كل الناس بهايم ورعاع ومايمشوش إلا بالكرباج.. مش عارفه ليه حاسه انى شايفه فيلم رد قلبي قدامي
والاهم من دا كله.. وظيفة متواصلة.. بدون أجازات سنوية.. بدون اجازات عارضة.. بدون اجازات مرضية
اللي يغيب لأي سبب هايتخصمله
ولو طقت في دماغها انها تنزل الناس جمعة او سبت هاينزلوا.. من غير مقابل إلا عن يوم واحد فيهم
دا حتى أيام الثورة يا مؤمنين.. ايام الثورة وقت حظر التجول والبلطجة وغياب الأمن.. كنا مجبرين ننزل الشغل
ماكانش فيه حاجه تتعمل بس عشان هي نفسيا ترتاح، وانها - على حد قول احد الزملاء نقلا عنها - عاوزة تشوف فلوسها قدامها

لو ليك حق عندها ممكن تستنى بالشهور عشان تاخده.. وطول الوقت لازم تبدي صبر ومثابرة عشان مافيش حاجه بتنقضي من غير زن
لكن لو عليك ليها حق بتاخده في ساعتها ووقتها
ولو مش عاجبك الباب يفوت جمل وبكرة اجيب عشرة برقبتك
ماحدش عنده وظيفة محددة.. كلنا قطع شطرنج ما بتحركناش غير ايد واحدة
مافيش حاجه بتتم إلا برضاها وتحت عينيها وبموافقتها.. مع ان فيه ناس وظيفتهم انهم يعملوا الحاجات دي
حتى الاشراف على عمال النظافة.. بتبقى على ايديهم وممكن تمسك المقشة وتكنس معاهم
ودا مش تواضع منها قد ماهي ما بتثقش في اى حد إلا في شغل ايديها

لما انت بسلامتك بقى تحاول تقابل الراس الكبيرة ممكن تتلطع قدام قدس الأقداس (على بابها يعني) 5 او6 ساعات لحد ما تفضى وتتعطف وتكلمك
( مع انها غالبا بتكون بترغي ف أي هذي وخلاص)
لما تحاول تعرف منها اي معلومة.. تكون شاطرة اخر حاجه في الهروب من المواجهات والاسئلة
تعملك البحر طحينة ومن الفسيخ شربات
وتوديك البحر وترجعك عشان ومقدد ومملح وشارب من البحر لما طفحت

والنبي شوفيلي مش عارفه ايه
بص على ده ياخويا وشفلي فيه ايه
دا غير انك مادام اشتغلت في المكان ده فحياتك كلها ملك ليه
يعنى يادوب تروح تنام وتصحى تنزل الشغل
الناس بالنسبالها مجرد آلات حصاد للفلوس
هي شايفه انها هي اللي عملتلهم قيمة
ولازم يسبحوا بحمدها عشر مرات كل يوم
المكان ده بيشهد حالات هجرة جماعية منه مش طبيعية.. ماحدش طايق وعندهم امل ان الحال ينصلح
وبرضه مافيش فايده
دا غير بقى المعاملة المش طبيعية واسلوب الكلام والتحكمات الفارغة طوووول الوقت
هاتقولولي قاعدين ليه؟
هاقولكم في الظروف اللي احنا فيها دي.. اللي يسيب شغلانه لقاها يبقى اهبل

الميزة الوحيدة في الشغلانة دي انها خلت عظمنا ناشف
لو اتحطينا في اي شغل او اي مكان هانسلك فيه ونتفوق كمان

بس ليا حق اتعب نفسيا من اللي بيحصل ده ولا لأ؟؟
قلبي بيتقطع على اي واحد او واحدة بيرفعوا ايديهم للسما وباعلى صوت وحرقة بيدعوا لربنا انه يا يهديها يا يهدها
هاتقولولي مافيش شغلانه كده كلها اسود ف اسود
هاقولكو حتى لو فيه نقطة بيضا.. الاحساس بالقهر بيطمسها
معاملة العبيد او اقل

ويصعب على الواحد نفسه لما يكون متكتف ومش قادر يمشي عشان عنده التزامات كتيرة هايحتاس فيها وناس هاتحتاس معاه كمان

يبقى ساعتها الحل ايه؟؟ حد يقولي

عشان كده باصرخ بأعلى صوتي

مطلوب وظيفة.. مع مراعاة الآدمية

مفارقة

زمان
التدوين كان أشبه بمهرجانات موسيقى الشارع

دلوقتي
التدوين بقى شبه كافيه يوناني أرستقراطي قديم
ومهرجان موسيقى الشارع اتنقل للفيس بوك :))

شكرا لضيوفي الدائمين

يا مراكبي

حسن ارابيسك

وشكرا لكل لهو خفي مر وقرا واتأثر بحرف انا كتبته :)

حالة غنائية غير عادية

خلال زيارتي اليتيمة للبنان السنة اللي فاتت كان جزء من برنامجنا اننا نزور مهرجان موسيقي.. احتفال باطلاق مشروع ما او بالاصح مسلسل انترنتي يخدم قضية ما
وكان من ضمن البرنامج عرض مقاطع من المسلسل ده ومناقشة فكرته مع تقديم العديد من الفرق الموسيقية في مدينة الملاهي اللي كانت بتستضيف الحدث ده
كل اللي فاكراه قد ايه الدنيا كانت زحمة.. قد ايه الدوشة كانت عاليه.. قد ايه الفقرات اللي كانت بتتقدم على المسرح مرعبة
من واحد بيتحول لدراكولا على المسرح وعاوز يثبت انه من بيروت عن طريق قطع احباله الصوتيه ، لواحده حرانه شويتين ما بتقولش غير كلمة: " ياللي بدك فييييه.. أنا عندي إياااااه ". والمفروض اننا نصدق ان دي أغنية..
وكانت الفقرة الاخيرة مختلفة تماما
اختفى الزحام من حواليا واختفت كل الاصوات وما فضلش حواليا غير أنا وهي
ليها كاريزما وحضور.. رقيقة .. هادئة.. قوية جدا وواثقه من نفسها بتواضع جميل
مسكت الميكروفون وماكنتش عاوزاها تسيبه ابدا
ساعتها اختفت كل الفروق.. وبقت قضايا زي اختلاف اللهجات والاهتمامات بالموضوعات حاجات هامشيه جدا
صوتها واحساسها كان في الهواء من حواليا وكأني كنت باتنفسه
الست دي ثورجية.. متجددة.. أفكارها من دماغها
حالمة.. وواثقة من نفسها.. وبتحب اللي بتعملها وواثقه فيه جدا
وعرفت اني مش هانساها أبدا.. " تانيا صالح "


لما رجعت مصر بقيت ادور على أي حاجه تخصها.. وزي أي حد بيغني الأغنيات البديلة - مش عارفه مسميينها بديلة ليه مع انها هي الأصل - مش متواجده في حسابات السوق
بس لقيتها.. وحبيتها أكتر واكتر
ثورجية مثقفة ... درست الفن وكتبت لنفسها ولغيرها
وسيلتها في تطوير مجتمعها هو الكوميديا السوداء.. مؤمنة ان العالم العربي مش ناقصه أغاني الحب فما حبتش انها تضيف له جديد
نقدت سياسات بلدها لبنان بكل جرأة.. غنت للوحدة الوطنية بكذا شكل
متهيالي لو كانت مصرية كانوا اعتقلوها من زمان

شوفوا الكليب ده عشان تعرفوا قصدي ايه
وفيه بتعلن قرفها الصريح من الكلامنجية السياسيين مادام مافيش حاجه جديدة بيعملوها غير الكلام

امبارح بس... عرفت بالصدفة انها حققت أعلى مبيعات للالبومات الاصلية على مستوى فيرجن ميجا ستورز في لبنان.. ودي كانت صدمة لناس كتير جدا ﻷن جمهورها ومستمعينها زادوا .. ضحكت جدا لما لقيت تلميحات باتهامات انها ممكن تكون بتشتري البوماتها بنفسها او انها متعاقده مع فيرجن ماديا عشان يحطوها في المكانة دي.
ودي حرب السوق التجاري على كل ماهو غير مالوف.. بس ماعتقدش انها ممكن تشغل بالها بده كتير
لما باتفرج على واحد من كليباتها بحس بجد بفن مختلف.. لا يا جماعه بجد الست دي مختلفة جدا

شكرا تانيا صالح.. تستاهلي من العالم كله انحناءة وشابوه

دي كانت اخر اغنية قالتها في حفلتها اللي حضرتهالها.. قعدت سنة كامله ادور عليها لحد ما نزلت في ألبومها الجديد
من هنا تلاقيها

دا الموقع الالكتروني الخاص بها.. هاسيبكم تحسوا الكلام اللي انا باقوله بنفسكم