الخميس، 7 مايو 2009

إزاي دي تبقى أم


شفتها

شكلها عادي جدا

مليانه وملامحها ريفية

معاها طفلين واضح جدا انها مش مهتمة بنظافتهم الشخصية

الكبير اللى عنده 8 سنين قاعد فى حاله ومشبك صوابع ايديه

مرة واحده لقيتها نزلت على ظهره بضربة ذرية... طرااااخ

قلتلك ماتعملش كده تاني

الواد اتفزع .. وراها ايديه المتشبكة وقال: انا عامل بس كده يا أمي .. هى دى فيها ايه

صفعاتها اتركزت على وجهه وقالتله: باقولك ماتعملش كده تاني

فزعتنى صرخة الطفل اللى مسك عينه.. أمه وهي بتضربه دخلت صباعها فى عينيه

كشت الام شويه وقالت: طب معلش

طالعه بصوت ضعيف ومن تحت الضرس

الأخ الصغير اللى عنده 6 سنين حضن اخوه الكبير

الأم قالتله: مالكش دعوه بيه.. سيبه

الولد ساب اخوه بخوف وحاول يمسح الدموع اللى غرقت وش اخوه

الأم قالتله: شكلك عاوز تنضرب انت كمان.. باقولك مالكش دعوه بيه

أسمع برطمة كلام من الأم وهى بتكلم الطفل الكبير الباكي مافهمتش منها إلا: انت اصلا مش فارق معايا

الولد الكبير يبطل بكا ويقعد هادى منكسر

الولد الصغير حط ايده على ظهر اخوه وطبطب عليه

راحت الام جابداه من دراعه ووقفته الناحية التانيه.. خليك واقف بقى

طلعت لبان من شنطتي.. واديت واحده للصغير اللى وقف جنبي

الولد اتكسف وقالى .. لا والله ماهاينفع

يابنى ما تحلفش بس

رفض مرة واتنين وفى التالته قال: قولى لماما الاول

ابص على الأم اللى اترسمت على وشها ابتسامه من الودن للودن - طب ماهى بتعرف تبتسم زى البنى ادمين اهيه.. كنت فاكره وشها هايشقق - وقالتلى.. هو لو عايز ياخد

آل يعنى ديموقراطية قوى

ومع الحاحي الولد أخد اللبانة

اديت للأخ الكبير واحدة وبرضه تكرر مسلسل الرفض

لكن مع ابتسامتي قبل ياخدها بسرعه

رمى الطفل الصغير الورقة على الارض.. قلتله لأ ماتعملش كده.. لما تبقى معاك ورقة امسكها فى ايدك او حطها فى جيبك لحد ما تلاقى سلة زبالة وترميها

اخدتها منه وحطيتها فى جيب شنطتى

الولد الكبير بصلى وحاول يرمى الورقة من الشباك وكأنه بيقول: انا باسمع الكلام اهوه ومش هارمى على الأرض

تؤ تؤ تؤ.. هاتها

ناولهالي وحطيتها مع ورقة اخوه.. وحسيت انهم فهموا الدرس

وابتسموا برغم التكشيرة اللى رجعت تلزق على وش امهم تانى

شويه كده وراحت فى النوم

لقيت الطفل الكبير شبك صوابعه تانى وقعد يتأملهم وكأنه بيحاول يكتشف ايه المشكله اللى فيهم اللى تخليه يتعرض للعقاب القاسي ده

قربت محطة السيدة زينب.. الاولاد قاموا من اماكنهم عشان يسمحوا لسيدات أكبر سنا انهم يقعدوا

بمنتهى الأدب والهدوء اللى فى الدنيا

ولما جم يمشوا عملولى باى باى بأجمل ابتسامه ممكن تترسم على وش اطفال

حسيتهم ولاد ناس متربيين جدا مع ان منظر امهم ونظافتهم الشخصية يوحي بالعكس


سرحت فى حكايتهم وبجد استغربت

هى التربية عبارة عن أكل وشرب وضرب وبس؟

دول لما يكبروا هايعتمدوا على انفسهم ازاى وكل حركة يحاولوا يستكشفوا بيها حاجه يتبعها عقاب أليم فوري

خلال النصف ساعة اللى قعدتها معاهم سمعت منها كلمات زي: هاموتك من الضرب.. استنى لما ننزل وشوف هايحصلك ايه

اقعد ساكت وإلا هاتتضرب

ضرب ضرب ضرب.. ايه هو فيه ايه

إزاي دى يطلق عليها اسم أم

هى دى انسانه أساسا؟؟

12 حط دماغك:

يا مراكبي يقول...

غالبا هي مضغوطة جدا وطلعان عينيها من حاجة تانية فبتنفس ده من غير وعي في عيالها .. لو حد منهم قال لها صباح الخير ممكن برضه تضربه .. فيه ناس كده

Unknown يقول...

للأسف كثيرا من أمهات اليومين دول مايعرفوش عن الأمومة غير انها سيطرة بلا داعي
أم عن ذلك الموقف فاعتقد ان الأم بتشتغل مدرسة !!!
تقبلي مروري وتحياتي وشكرا على مرورك على مدونتي

ويبقى التواصل

Unknown يقول...

للأسف كثيرا من أمهات اليومين دول مايعرفوش عن الأمومة غير انها سيطرة بلا داعي
أم عن ذلك الموقف فاعتقد ان الأم بتشتغل مدرسة !!!
تقبلي مروري وتحياتي وشكرا على مرورك على مدونتي

ويبقى التواصل

micheal يقول...

للأسف بنتفنن في ازاي نربي أولادنا علي الخوف والقهر من أولها وبالتالي يطلعوا من غير شخصية ويقولوا امين علي أي حاجة غلط يشوفها
ألاقيش معاكي باكو لبان يا بت
:)
تحياتي

Unknown يقول...

دة على قد ثقافتها يا وينكى متعتبيش عليها هى عايزة تربية وتقويم قبل اولادها اصلا

بس فعلا هو ايه الغلط فى انه يشبك صوابعه؟؟؟

. يقول...

بجد بجد
الموضوع ده بجد كان لازم حد يفتحوا
مش عيب نطلع امهات بتغلط يعني
يعني هوا في ايه صح فالدنيا
عشان بس محسسننا ان الام دي هي الي خلقت الولد مش بس السبب في وجوده فالدنيا
يارب حد يسمع و يستفيد
تحياتي

بسمه عبدالباسط يقول...

يوووووووووووووة

على فكرة الموقف ده بيحصل كتير للأسف

المشكلة انهم بيبقوا فاهمين ان الضرب وسيلة من وسائل التربية السليمة وهما مش عارفين أنهم بيخلقوا عقد نفسية عن ولادهم

رجل من غمار الموالى يقول...

عادى
..........
كثير من الأمهات والأباء كده
.......
واقع غلط وناس غلابة
وظروف صعبة
...
سيبيها لله

Unknown يقول...

شكلها بتتفشش

ممكن مش مبسوطه مع جوزها وممكن حماتها مجننيتها وممكن ألف سبب وسبب

البني آدم بس ينضغط بيبدع ويطلع قرفه على أقرب الناس ليه

كيفك صح؟

وينكى يقول...

يامراكبي
مهما حصل.. الطفل ده مالوش ذنب
انا كنت حاسه انها مرات ابوه مش امه
كمان مهما كانت مضغوطة ازاى ما تهتمش بنظافة اولادها كده
معتز شاهين
دى مشكلة بجد وللاسف بتتفاقم خطورتها لأن الاجيال الجديدة مش سهلة القياد زى الاجيال السابقة
ماعرفش الام بتشتغل ايه بصراحه بس ايه العلاقة؟
شكرا لردك
مايكيييي
هو ده اللى بيحصل وبنورثه لاولادنا من غير ما ندرى
عاوز لبان تعالى خده
:)
انجي
نفسي في برنامج تأهيلي يعطى للاباء والامهات قبل ما يتجوزوا من الاساس عشان يعرفوا يربوا اولادهم صح
انا اعرف البرامج دى بعض الكنائس بتعملها
بس انا عاوزه تعميم التجربة دى
يابنتى انا قعدت انا كمان اشبك صوابعى عشان اشوف فيها ايه
ههههههههههه
sad-dorra
الموضوع خطير فعلا
الامهات بشر بيغلطوا برضه
بس لا انكار على انهم بيحبوا اولادهم برضه
ومن الحب ما قتل.. :)
بسبس
لو اتكلمنا من هنا لبكره برضه مافيش حاجه هاتتغير
والله يابنتى باقعد افكر فى اولاد الاجيال دى شكلها هايطلع ازاى
رجل من غمار الموالي
طب وليه الاخطاء بتتكرر
ليه ماحدش بيحاول يكسر الدايرة ويصلح الاخطاء دى مع اولاده
هايقولولك اتربينا كده؟ طب ماحنا اتربينا غلط
مياسي
اخبارك ايه يا بنتى
ليكي وحشة.. انا متابعة مدونتك حتى لو مش باعلق
احتمال كبير انها تكون قرفانه من عيشتها
بس برضه دا مش مبرر
منوراني ويارب اشوفك على طول

nudy يقول...

طبعا ده منطق ناس كتير دايما بيتخيلوا ان الاطفال دول ما بيحسوش ولا بيفهموش
مع ان الاطفال من اكتر الكائنات حساسية وفهم وذكاء وطبعا التربيه دي ما بقتش موحوده تقريبا الاهل بهتموا بس بانهم يوفروا الاكل والشرب والفلوس اللي بتخلي الاطفال تدمر حيانهم عندي طفل في المدرسةاللي باشتغل فيها ابوه مفاول والولد عنده 12 سنه ومدمن من سنتين وهي دي التربيه اللي اترباها وغيره كتير اصل دلوفت اللي بيربي الكمبيونر والنت والدش

وينكى يقول...

نودى
زى ماقلتى
الناس فاهمه التربية غلط
نفسي بجد يبقى فيه تصريح الناس بتاخده قبل ما تخلف يشترط انهم يكونوا واخدين كورسات فى التربية السليمة قبل ما يتجوزوا ويخلفوا
ليه ما يطلعوش قانون بالشكل ده بدل قانون الكشف الطبي الاهبل