الأربعاء، 23 نوفمبر 2011

حين تفرقت بنا السبل

الساعة دلوقتى 4:03 من فجر يوم الأربعاء 23 نوفمبر 2011
دخلت على جوجل وكتبت في محرك البحث كلمة " وينكى"
عادة عبيطة ماعملتهاش من زمن.. كنت عاوزه أشوف هل النتائج اللي هاتطلعلي مختلفة عن النتائج اللي كانت بتطلعلي زمان

البحث بالصور من اسهل واجمل الحاجات.. واكثرهم إثارة للذكريات
مدونات.. مدونات.. مدونات لا حصر لها.. في كل مدونة ومع كل مدون صاحبها فيه ذكريات جميله خلتني أبتسم وعيني تدمع
أسماء كتيييييرة قوي عدت عليا.. يا الله.. كل الناس دول كنت اعرفهم وكانوا يعرفونى ف يوم من الأيام؟؟

ابص على التواريخ بتاعت المدونات... أقرب واحد فيهم كتب اخر بوست ليه في 2010
احسن حالا من اللي اخر تواريخ موضوعاتهم كانت 2007، 2008

فين الناس!!!... راحوا الناس

مكان في القلب.. سكوت هانصوت.. رسالة من تحت الماء.. زحل الفلكي وعلي الالفي وهستيريا
عاليا حليم والبيدا.. حفصوتشا والصراحة خنقة وكراكيب وروكا وسمراء النيل وعاليا حليم ونبضات
كريم واحمد اسماعيل واحمد بلال وهالة ومايكل وعمرو وآدم المصري ومريم ومي ومانو وفيمتو وإيليان ونادين ومحمود
صاصا والصباغ وانسان جديد وحياة افضل وياسمين واسفة لو الذاكرة ما اسعفتنيش افتكر الباقي
كل اصحابي المدونين اللي بره مصر من الشام والاردن وعمان وكندا وامريكا
يمكن خالد الصاوي من اكتر الناس المثابرة اللي لسه على الساحة.. بس مشاغل الحياة حولت بيتنا التدويني الكبير الجميل إلى صحف الكترونية مش اكتر
مابقتش المدونات هي النادي الفكري والادبي اللي بنتبادل فيها الاراء والأفكار والنقاشات.. واخبار الحياة كمان
كنت كتبت قبل كده موضوع عن المحاربين القدماء واصحاب الاقلام التدوينية القديمة.. وبجد بناشدهم انهم يرجعوا لبيوتهم تاني
دلوقتي انا مفتقدة بيت العيلة الكبير والقلوب الصافية والاصحاب اللي بجد
أيام الاجتماعات التدوينية في الاوبرا وعلى البورصة والدقي
حفلات موسيقية واعياد ميلاد ومسرحيات وحفلات توقيع كتب وتصوير وإذاعة وصحافة وتليفزيون... وحفل نجاح وتخرج :)

ياترى هنرجع تاني؟؟



الصورة دي من أكبر تجمع تدويني حصل في تاريخي الطويل... حفلة المدون علي الالفي مع فرقة step by step
تقريبا كان أول تجمع تدويني أعمله دعاية بجد :) أيام وكالة وينكى للدعاية والإعلان و Blogger radio station
كانت أياااااااااااااااااااااام :)

4 حط دماغك:

حسن ارابيسك يقول...

معاكي كل الحق التدوين فقد الكثير من المدونين وكثيرون يفعلون مثلك يبحثون وتذكرون تلك الأيام الجميلة الأيام التي كان يعتلي فيها التدوين عرش النت
تحياتي
حسن أرابيسك

وينكى يقول...

فين الناس؟؟.. راحوا الناس :(

يا مراكبي يقول...

ده سبب من الأسباب

http://yamarakby.blogspot.com/2011/12/blog-post.html

وده السبب التاني

http://yamarakby.blogspot.com/2011/09/blog-post.html

وينكى يقول...

ماحنا مش لازم نستسلم يا مراكبي
نورتني