الاثنين، 25 يونيو، 2012

أنا ما أتكسرش



مش عود قصب يبّس في إيد الطفل
مش تحفة وقعت من إيد مهملة على انشف ارض
أنا ما اتكسرش
وان كنت فاكر اني انتهيت
تبقى التهيت
ولاعدت تعرف مين أنا
أنا ما اتكسرش
الخيزران بينحني لما تهب العاصفة
مابينكسرش
وان كنت فاكر انه ضعيف.. ماتفتكرش
ماتغركش المناظر
أعتاها شجرة بتنكسر.. رغم الصلابة ف شكلها
قدام هوا.. راح تنكسر
لما الطبيعة بتبتدي تحط القانون
شوف الدروس
صحي النفوس
وبلاش في وهمك تتحصر
مش هاتكسر
لو حتى قالوا وشنعوا
لو حتى سهم العين دبحني
هاخد رموشها وبيها اخيط ع الجراح
ومن دموع قلبي هاعبّي
واحط من الملح على جرحي طن
مش  هاتكسر
وارفع دماغي للسما.. واقول يارب
اديني صبر
اديني عزم
اديني قوة
عشان ما انكسر
مش هانكسر

4 حط دماغك:

βent Pasha يقول...

جبارة وقوية حقيقي

حلوة العزيمة للي فيها دي بجد

:-))

تحيتي لقلمك

تقبلي مروري

وينكى يقول...

:)

حسن ارابيسك يقول...

الله .. الله
ايه ياوينكي الحاجات الحلوة دي
لا بصراحة من الحاجات العامية الجميلة اللي قرأتها ليكي
مفردات القصيدة ومعناها حلوين جداً
تحياتي
حسن أرابيسك

وينكى يقول...

شكرا أرابيسك باشا
كل لحظة وانت طيب