الجمعة، 29 يونيو 2012



ذات مومنت لما الواحد يكتشف ان الدنيا مش وردي قوي
وان الكلام مافيش أكتر منه
وان الأمان مش بيتباع في الأسواق
وان الظروف... دايما أقوى من الحب


ذات مومنت لما تسمع كلمة الوداع
فجأة وبدون مقدمات
زي ما قصر الرمل على الشط بيتهد
مع أول موجة


ذات مومنت لما تحس بخنجر التلج
بينغرز جوا صدرك
رغم حر الصيف.. إلا انك مش مرتاح
وكأن قلبك جوا تلاجة بيسبب الرعشة لأطرافك


لما تحس ان انت مش انت
تسمع الكلام بودن حد تاني
تتكلم بلسان حد تاني
تشوف الدنيا وكأنك حد تاني
تعدي يومك عادي
تقنع نفسك انه مجرد حلم
حلم سخيف وهاتفوق منه
تقرص نفسك يمكن تفوق
تصرخ بشدة يمكن تصحى
لكن تكتشف ... انه بجد


ذات مومنت لما تفتكر كل اللي اتقال
أحلام.. أفكار.. آمال
وعود.. نجوم وابتسامات
وخطط حياة طويلة تتمنى انها ما تنتهيش
وتكتشف فجأة
انها انتهت


تصدق ساعتها
ان الدنيا مش وردي قوي

وان الكلام مافيش أكتر منه
وان الأمان مش بيتباع في الأسواق
وان الظروف... دايما أقوى من الحب

5 حط دماغك:

βent Pasha يقول...

ذات مومنت
:-)

سلمت يداكي

فوكش يقول...

قعدت أفكتر كل "مومنت" حسيت فيها بالكلام الي بتقوليه.

بغض النظر لو الكلام دا عن تجربة, أو من "وحل" خيالك, فهو كلام رائع وصحيح.

بقالي زمان ما زرتش "البلوج" بتاعك وسعيد إني زرتو :)

وينكى يقول...

بنت باشا
:) اهلا بيكي

فوكش
حمد لله على السلامة ومنور بعد غياب
بعيدا عن كونها وحل خيال او هباب الحقيقة
المهم المعنى وصل.. وهو حقيقي قوي

حسن ارابيسك يقول...

صحيح الدنيا مش وردي قوي
والانسان لما دايما يكون شايف صح بيكون مستعد لأي مفاجأة وبالتالي يتجنب اي صدمة
تحياتي

وينكى يقول...

لو الواحد فضل مستني لحظة الوجع طول عمره
هايقدر يستمتع بالحلو اللي في حياته امتى؟؟؟

لازم هتيجي لحظة تدي للدنيا الأمان
وذات مومنت......


شكرا لمرورك ولرأيك :)