توك توك توك ( صوت طرقات على باب خشبي )
زيييييييييييييييييئ ( صوت صرير الباب )
تك.. تك .. تك.. ( صوت خطوات )
كح كح كح.. هااااااااتشووووووووووووو ( دا طبعا بسبب التراب )
تششششك ( صوت إشعال عود ثقاب )
يااااااااااااع ( خيوط عنكبوت )
تم تم تم تم ( صوت تنفيض فوتيه )
إيييييييييييء ( صوت صرير الفوتيه أثناء الجلوس عليـــ...
خلاااااااص كفايه فيه ايه
مش باشرح للناس الحالة
حالة ايه يا ستي.. عرفنا انك داخله المدونة المهجورة بقالك كتير واتملت تراب وعنكبوت من زمان.. مش لازم تقولي للناس بالموسيقا التصويرية يعني
خلاص بقى صلي على النبي.. حبيت اعمل جو ساسبينس مش اكتر
ساس.. إيه!!... اجري من هنا يلا خلينا نقول الكلمتين اللي جايين نقولهم قبل ما انساهم
يا سلااااااام.. على أساس انك انتي اللي جايه تتكلمي
طبعا أساسي أمال انتي؟
أنا صاحبة المدونة مش انتي
وأنا وانتي ايه يا مغفلة؟؟
اه صحيح ( وش مكسوف ) :q
وحشتوني
بجد بجد كل حاجه هنا وحشتني
وحشتني الفضفضة على زراير الكيبورد
وحشتني تعليقاتكم وردودكم وحماسكم لأي حاجه باكتبها
وحشتني افكاري وهذياني اللي مالهومش آخر
المرادي الغيبة طولت شوية.. بس كان لازم ارجع النهاردة
لأني زي الايام دي ومن 5 سنين.. كنت ساعتها باعمل بوست زي ده واقول للناس.. انا بقيت مدونة ولأول مرة.. وانتميت لعالم التدوين الساحر
يوليو 2006.. الرقم مش قديم قوي بس الأيام هي اللي بتجري بسرعة
هنا احتفلت بكل حاجه حلوة في حياتي
احتفلت بنجاحي وتخرجي.. احتفلت باعياد ميلادي واعياد ميلاد أصحابي
حتى احتفالي باكمال عدادي 1000 زائر كان برضه هنا :)
هو ماكانش هنا قوي.. اللي عارفيني من زمان عارفين المآسي اللي حصلتلي ومدونتي اللي اتسرقت واتدمرت مني مرتين
حتى عنوانها ماكانش winky wankoka - كان ساعتها pinsy winsy
ومن الكلمة دي سميت مدونتي: حاجة صغنونة.. من غير فذلكة
ومن هنا كمان أطلقت مدونتي الفلكية: نجمة في السما - برضه الله يرحمها -
كان مشروعي اني أقدم معلومات فلكية مبسطة للناس عشان مايخلطوش بين الفلك الحقيقي والابراج والعك اللي الاعلام بيحاول يسيطر بيه على عقولنا
ياااااااااااااااه... كانت أيام
ياترى هاقدر أرجع اللي فات؟
مش المواضيع اللي كتبتها ولا أعداد الزوار اللي انشغلوا وراحوا
هل قلبي هايقدر يرجع زي زمان.. يرمي كل حموله على الكيبورد ويستنى النصيحة من الغير
5 سنين يقدروا يغيروا كتير في حياة أي انسان.. ولازم وحتما اكون اتغيرت
لأن دي سنة الحياة
كل يوم من السنين دي مريت بخبرة او بتجربة .. حلوة او مرة
المحصلة النهائية اني لازم اتغير
عموما أتمنى ان التغير ده يكون للاحسن .. وحتى لو قلبي اتغير.. أتمنى ان روحي تفضل زي ماهي

كل سنة وانتو طيبين .. رمضان على الأبواب
أتمنى ان رمضان ده يرجعلي ذكرياتي الحلوة .. بقالي كتير ماحسيتش ببهجته.. بقالي كتير ما حسيتـــ...
كفاية رغي بقى ارحميني.. انا كنت عارفه اني لو سبتك دقيقة هاتعملي نوبة صداع عالمي
خلاص خلاص.. الواحد يعني ما يقدرش يبعبع شويه باللي جواه
يلا يا ماما لو سبتك لبعابيعك مش هانخلص
ياساتر عليكي متسلطة
ماشي ماشي حسابنا بعدين
خلاص هامشي اهوه.. ماتنسيش تبقى تيجي تاني تنضفي الدهولة دي
نعم نعم.. وانا انضف ليه يعني.. ماتنضفي انتي المكان.. ولا فالحه بس تقولي مدونتي وبيتي وحتتي وفشتي
وانا وانتي ايه يا روحي ;)

غلبتيني بالكلام.. يلا طيب دلوقتى نمشي من هنا
اوكي.. سلام يا اصحابي بحبكم :)

شكرا لمن أضاء روحي

بداية أود أن استهل كلامي بان من أتحدث عنه الآن لم تربطني به سابقة صلة من قريب أو من بعيد
ولم أعتد أن يكون بيتي هذا مكانا للدعاية لأي شخص كان
بل كل ما كتبته وساكتبه الآن ناجم عن انفعالاتي الشخصية باشخاص أو مواقف أو حتى مجرد أفكار
لذا وجب التنويه
* * * *
كم أحب هذا الصوت
أسمعه في الليالي الندية فيلفني بدفئه واحساسه
أشعر بهذا الصوت يضمني كطفل صغير تحنو عليه أمه.. فتتألق ابتساماتي أو تسيل دموعي
كم احب ذكاؤه
ذلك الذكاء الفني الذي حماه من أن يعيش في جلباب أبيه.. بل ساعده بأن أخذ من قماشه فصنع منه ثوبا خاصا به لا يليق بغيره ولم أسمع له مثيلا على الساحة الحالية
انتقى كلماته بعناية.. فتسمع في صوته مشاعر وأنات وشوارع وبيوت
فرحة شعب وآلام هجر.. مناجاة للرب.. تشجيع وحماس..ودعوات أم
حبيبة في عيون الناس عادية.. وبشر سعداء وأشقياء
كم أحب روح الفريق التي تنبض بها أعماله
تستمع لقطعة فنية فتاخذك الحيرة.. من هو بطلها الحقيقي
الكلمات أم اللحن أم التوزيع
العازف أم المطرب أم الكاتب أم المنتج الذي دعم هذه الجرأة وسمح لها بالخروج للنور لتستقر في وجدان البشر ويحفظها له التاريخ

يتشعب الكلام ويظل قاصرا عن التعبير عما يجول بصدري
أتمنى أن تسعفني كلماتي كي اقدم الشكر اللائق لمن يستحقونه

محمد عدوية... شكرا لأنك أضأت روحي

أحزاني القديمة

من زمان
اتعودت أفتح أدراجي القديمة
أفتش وسط أوراقي ودفاتري
أدور على ذكرياتي الأليمة
عشان أبكي عليها
سبع سنين... عشر سنين
أو حتى عشرين سنة فاتو من عمر الزمان
وكنت عن الأحزان لسه بادور
ودلوقتي
ماعدتش محتاجه لآلامي القديمة
الزمن أهداني اوجاع جديدة
Brand New
ماوردتش على قلب بشر في العالم
نستني كل أوجاعي القديمة
وتقليب الدفاتر
وجلد الذات على هفوات الماضي التافهة
وأحزان الطفولة البريئة
شكرا للزمن الجديد
وشكرا لآلامي
شكرا للنهاردة ولبكره
خلوني أنسى امبارح
وأرمي الماضي وراء ظهري وابص لقدام
لأحزاني الجديدة

مش عارفه

مش عارفه ليه بقيت حاسه
كل الوشوش بقت واحده
كل النفوس بقت واحده
كل الكلام صار واحد
وكأن الدنيا صبحت حكاية
أرويها الصبح ويكملها بعدي الف راوي
صبح ومسا
ليل ونهار
ومافيش جديد
غير فكرة جوايا... تنور ف عقلي مرة واحده

تعبت من كوني محبوبة

ومن لعب أدوار البطولة

وما عادت مراكز الصدارة تستهويني

ولا تشبيهي بأميرات الأساطير

فما وجدت فارسا ينقذني

ولا حبيبا يحميني

فصارت كل حكايا الحب لدي

بلا معنى

أشعار

عندي أشعار

يهيج لها البحر إن ألقيت فيه

وترعد السماء إن تليت عليها

وتتزلزل الأرض.. بجبالها وهضابها وسهولها

إن ردد صوتي لحنه الحزين

كلمات لا حصر لها.. يختزنها قلبي

وعقلي وأوراقي

صارت حبيسة أدراجي

وماعلمت لها من مفر

بداخلي أشعار

عن الوطن.. عن الأمل

عن الحب وعذابه

والجرح وويلاته

عن البشر.. سعيدهم وتعيسهم

عن بسمة طفل.. تلمع في عين أم ثكلى

وعن صرخة ألم امتزجت بصرخات ميلاد جديد

عن الدنيا.. أفراحها وأتراحها

بكل متناقضاتها

عن قصص عشق لم يكتب لها أن تتم

وأخرى انتهت قبل أن تبدأ

وأخرى استهلكت.. فصارت ذكرى

تلوكها الألسنة ثم تلفظها لبئر النسيان

قصص عن عوالم خرافية.. تصدق فيها الوعود الوردية

وتنتهي دائما بـ " وعاشا معا بسعادة للأبد "

بداخلي قصص

أشعار وحكايا لا تنتهي

عن طفل وطفلة

عن كهل وقطة

عن عصفور وثعلب

عن وطن وغاصب

وعلاقات دولية فاسدة

وأناس يتظاهرون بالسذاجة وآخرين تحكمهم السذاجة

أشعار وقصص وحكايا

نصبت لها أسواق عكاظ

والتف من أجلها الرعاة حول نار الشتاء

وتلتها الجدة على الصغار

والآن

ترفل أشعاري بين حنايا قلبي

كاسحة.. قوية

لا يقبل بها رعديد... ولا هي تفعل

بداخلي طوفان أزرق

يطرق أبوابي المغلقة

فمن منكم يدنو ... لينهل؟

أحب جراحي

أن تصبح فتحات على بحور شعري

أحب أن تسيل دمائي

فتملأ دوايا حبري

فأكتب

أحب أن أنزع منظاري الوردي

فأرى الحياة مجردة من كل زيف

وأحب أن يسيل دمعي

فيوقد نيران الفكر في عقلي

فأظل أسيرة قلمي

ﻷكتب وأكتب

لكني لن أحب أبدا.. أن أعيش الهزيمة

أن أكون كسيرة

وإن جف يوما مداد حزني

فلن يعني بأني سعيدة

الدرس انتهى - صلاح جاهين

الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال

ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..

ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …

ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

أسبوع

يوم السبت: اتلاقينا

يوم الاحد: اتواعدنا

يوم الاثنين: بالحب بحنا لبعضينا

يوم الثلاثاء: سحابة صيف عدت علينا

يوم الأربعاء: حاولنا نحل مشاكلنا.. وماكانش بإيدينا

يوم الخميس: كان فراقنا

يوم الجمعة: لملمت اشلائي.. أعدت حساباتي..واتسلحت بقوة

لأسبوع جديد

اه ياني ياني ياني.... مش هاشرب منها تاني

في يوم مشرق وجميل كنت قاعده في شغلي لا بيا ولا عليا

لقيت واحد صاحبي - شاب كفاءة - اتصل بيا وقالي الحقي يا بت يا وينكي اخيرا اشتغلت

قلتلي لولولولولي ياخويا اخيرا فيه واحد حل مشكلة البطالة في مصر

وبتشتغل فين ان شاء الله؟

قالي: باشتغل في شركة مياه

طبعا كنت متفرجه قبليها بيوم على فيلم " السقا مات " واتخيلت صاحبي وهو حليوة ومسمسم كده وشايل القربة على ظهره ورايح يوزع مية على الخلق....

ياوينكي.. انتى يابنتى رحتي فين

انا معاك يامعلم... قلتلى بتعمل ايه بقى؟؟

لا انا مش هاقول... انا هاجى اوريلك الشغل على الطبيعة

وفعلا شرفنى الراجل بزيارة للشغل وبعد ازيك وعامله ايه والذي منه اكتشفت ان الشركة اللي بيقول عليها بتشتغل في معالجة المية

- ياحراااااااااام.. ماكنتش عارفه ان المية بتاعتنا عيانه..

عيانة ايه يابنتى.. دانتى اللى عيانه

الله يسامحك ياعم..

يابنتى افهمي.. انا باتكلم بجد

انتو فاكرين المية اللي بتشربوها دي مية بنى ادمين.. دى نسبة التلوث اللي فيها تجيب للبنى ادم 100 مرض... تعالي اثبتلك

وتخيلوا ايه اللى حصل

عمل تحليل للمية لقى فيها بلاااااااااااااااااااااااااااااااااوي

رصاص... كلور..... صدأ " المية مصدية يا جدعااااااااااان "

وبكتيريا

و.... احم احم... لا مؤاخذة.... فيها بيبّي

ياااااااااااااااااااااااااااااااااااااااااااع :s

نهار اسود ومنيل... احنا بنشرب الحاجات دي

طب ايه السبب؟؟؟

قالي اساسا المية ما بتتنقاش كويس والمواسير بتاعتنا متنيلة على الاخر وانسي ان مواسير مصر كلها تتغير عشان حاجه هايفة زي صحة عامة الشعب

(افتكرت ساعتها دكتورة طب مجتمع كانت بتدرس لاختي وقالت للطلبة: بصوا.. م الاخر، كل دولة بتنضف ميتها على قد فلوسها)

وطبعا احنا عارفين كويس قوي قوي ميتنا ايه وفلوسنا ايه وكان الله بالسر عليم :(

قلتله طب والحل ايه؟؟ نشرب مية معدنية!!!

انتي فاكره ان المية اللي بتشربوها دي معدنية بجد؟؟؟

يالهوييييييييييييييييييي... امال ايه؟؟

دي ميه معبأة يا ماما.. انتى لو هاتشربي مية معدنية بجد هاتلاقى القزازة بـ 75 جنيه

عاااااااااااااااااااااا... انا يجيلى جفاف احسن ما اعمل كده

طب وبعدين..كلنا نركب فلاتر يعنى؟؟؟

لقيته بصلي وبرق قوي وكاني شتمت عيلته واحد واحد وقالي: انتى عارفه الفلاتر بتعمل ايه؟؟؟؟

الفلتر اول مرة بينضف المية وبيحجز الشوائب والبكتيريا ميه ميه

تاني مرة البلاوي دى بتتضاعف فى المية.. ماهو بسلامته بيحوشهملك

واللى بعدها اكتر واكتر

بااااااااااااااس... بس بس الله يكرمك.. ايه فيلم الرعب ده

طب والعمل ايييييييييييييه؟؟؟؟

" معالجة المية طبعا".. بصي..

المفروض ان شركتنا بتروح للعملاء بتعملهم اختبار للمية بتاعتهم وبتشوف نسبة التلوث عندهم قد ايه قبل ما تحدد طريقة المعالجة

تكلفة الزيارة دي حوالي 300 جنيه بس عشان انتى صاحبتى وشابة كفاءة هاخلى اى حد يجيلى من طرفك مايدفعش جندي

طبعا كمصرية صميمة ما بحبش أفوت العروض والفرص اللى زي دى قلت لازم استغل الراجل بشركته ابشع استغلال

فاللي يحب يتعمل عنده فى بيته او شغله كشف على المية لقياس نسبة التلوث ويشوف الحاوي... قصدي الباشمهندس وهو شغال على عينك ياتاجر يبعتلي نمرة موبايله على إيميلي

romamory@gmail.com

وهايلاقي انسة حلوة مقطقطة بتتصل بيه عشان تشوف مواعيده ايه

يلا هاستناكو يا شباب ويا صبايا :)))

واى خدمة.. عدوا الجمايل بقى