أنا أدون لأغير

كل واحد يسأل نفسه سؤال صغنون جدا

أنا بادون ليه؟

ايه اللى يخليك في عز برد طوبة تقوم من تحت اللحاف وتجري على جهاز الكمبيوتر بتاعك حافي القدمين

تتخبط مرة فى رجل السرير ومرة تانية تتشنكل فى الكرسي

بس عشان تفرغ فكرة طقت فى دماغك وخفت عليها لحسن تضيع منك

ايه السبب الملح اللى جواك اللى مخليك تقضي اكتر من نصف يومك تقرا وتكتب وتتابع

هل هو وقت فراغ وبتقضيه؟

هل بتعتبرها وسيلة جديدة تتعرف بيها على صداقات جديدة؟

بتبرز مواهبك المدفونة واراءك الخاصة وكل حاجه فى بالك ماقدرتش تحققها على ارض الواقع

تعددت الأسباب والتدوين واحد

عن نفسي.. انا بادون تقريبا لكل الاسباب اللى فاتت

على الاقل احس انى باعمل حاجه في دنيا مش قادره اغير فيها حاجه

احساس جميل لما تعرف ان فيه انسان فى يوم كان مكتئب وكلمة منك تسببت فى انه يبتسم

احساس جميل لما تساعد انسان احتاج لمساعدتك عن طريق اجابة سؤال او مشاركة افكار او حتى كلمة بتطبطب بيها عليه

او حتى مجرد انك تحسسه انه انسان وانك مهتم

م الآخر.. انا بادون عشان أغير

وعلى مدونتي باحط اللوجو بتاع جروب الفيس بوك

الاتحاد العالمي للتدوين من اجل التغيير

لأني بارفض

أكون مجرد راس.. وسط القطيع

شكرا صديقي العزيز: لورد.. غير محدد على الدعوة وعلى الفكرة

ياريت تدخلوا عنده تقروا الموضوع

:)

كيفك انت

كيف كان يومك من دونى

؟هل استيقظت فى الصباح على صوت تغريد بلبلنا الصغير

هل شربت قهوتك فى الشرفة أمام شجرة زرعناها سويا

؟وكيف كانت قهوتك

أما زالت حلوة كما كنت أعدها لك

أم صارت منزوعة السك

روحين تشرد متطلعا للمجهول

هل رفت صورتى أمام عينيك ؟

هل ابتسمت لها أم عبست

ووجهك الجميل أما زال محتفظا بنضرته ؟

أم أحاطت تجاعيد الفراق قسماتك

أما زالت ذقنك النامية بانتظارى كى أزيلها

أم صار باستطاعتك أخيرا ألا تجرح نفسك

وحين تدخل غرفة كانت تجمعنا

ألازلت تشم رائحة عطرى بها ؟

أم هشمت كل زجاجات عطرى, وأفقدت أنفك عبيرها

ألازال اصبعك المجروح من السكين يذكر قبلاتى ؟

ألازالت أذنك تذكر همساتى ؟

أم ان صوت التلفاز الصارخ دوما أنساك نبرتها

ألازالت خزانتنا تحمل أثوابى ؟

ألازالت صيدليتنا تحمل فرشاة أسنانى ؟

أما زالت وردتى الحمراء فوق المنضدة حمراء نديه ؟

وان ذبلت.. هل استبدلتها باخرى

أم لم تكترث

أخبرنى بربك

كيف صار يومك بدونى ؟

كل التفاصيل الدقيقة فى حياتك.. تلك التى صنعتها لك

ماذا تفعل بها

وماذا ستفعل من دونها

ألازال مكانى فى قلبك كما هو ؟

وإن لم يكن

أحتفظت بمكانى شاغرا

أم أحللت أخرى ..تعيش معها يومك

بدونى

ولد رسام

باعشق محمود العسيلي

وباعشق أغانيه البسيطة اللى فى الجول اللى باعتبرها سهل ممتنع

لقيت الفيديو ده وقلت مستحيل يتفوت

لازم تشوفوه

صاحب الفيديو مدون اسمه احمد علي

www.accordingtoali.blogspot.com

هو اللى رسم وحمله على اليوتيوب

اتمنى انه مايزعلش منى انى اخدته عندى على مدونتي

مشاهدة سعيدة :)

موقف يفرس

ماشيه فى حالي النهارده الصبح

رايحه لشغلي وانا نص نايمه

ابص قدامى ألاقى شاب عشريني لابس جلابية بيضا وبدقن ومعاه واحد تانى لابس كاب وجينز وتيشيرت ماشيين عكسي

اول ما عدوا من جنبي راح اللى لابس جلابيه قال:

- ما تلبسي حاجه عدلة.. هو انتي مش مسلمة؟

وكمل طريقه هو والتانى اللى معاه

بصراحه انا ما عرفتش اخد رد فعل

وفكرت فى عشروميت حاجه فى جزء من الثانية

فى الاول كنت فاكراهم بيتكلموا مع بعض عن حد تانى

وبعد كده قلت يمكن يقصد حد ماشي فى الشارع غيري بس اكتشفت ان ماكانش فيه على الرصيف ساعتها غيري

اتغاظت جدا

اولا انا لبسي محتشم جدا وعادي.. يعنى مش بادي واستريتش

وحتى لو كنت لابسه ايه.. هو ماله عشان يقولى كده

فكرت فى نفسي وقلت: اهدي يابنتى هو ماشتمش ولا قال حاجه قبيحة زي غيره

بس الكلمة جرحتني

هو ماله يحكم على تدينى ولبسي بأى حق

طب مايمكن قصده يسدي نصيحة

وهو اللى يقول نصيحة يقولها بصوت واطي وييجري بنفس طريقة العيال السافله اللى بتعاكس

لو واحد عاوز يقول نصيحة اكيد هايقولها بقوه لأنه عارف انه معاه حق

هما بيعلموهم يامروا بالمعروف وينهوا عن المنكر إزاي بالضبط؟

كمان دا ان دل على حاجه فهو بيدل على انه رافض أساسا شكلي عشان انا مش منقبة او لابسه خمار.. وانا باعتبر دى عنصرية

ربنا هو اللى هايحاسبنى مش هو

فكرت انى اتخانق واقوله مالكش دعوه او اى حاجه.. لقيت ان المعركه مش هاتكون فى صالحي

دقنه حامياه والموضوع باين جدا في بلد لو فيه راجل وست متشاكلين هاينصفوا الراجل

وياسلام لو كان بدقن بقى

عالم بتاعت مناظر

وقفت على رصيف المترو حاسه بالغلاسة بتقطع فيا

ولقيتنى باقول من كل قلبي

ربنا يديه على قد نيته.. ان خيرا فخير وان شرا فشر

وبس

إزاي دي تبقى أم

شفتها

شكلها عادي جدا

مليانه وملامحها ريفية

معاها طفلين واضح جدا انها مش مهتمة بنظافتهم الشخصية

الكبير اللى عنده 8 سنين قاعد فى حاله ومشبك صوابع ايديه

مرة واحده لقيتها نزلت على ظهره بضربة ذرية... طرااااخ

قلتلك ماتعملش كده تاني

الواد اتفزع .. وراها ايديه المتشبكة وقال: انا عامل بس كده يا أمي .. هى دى فيها ايه

صفعاتها اتركزت على وجهه وقالتله: باقولك ماتعملش كده تاني

فزعتنى صرخة الطفل اللى مسك عينه.. أمه وهي بتضربه دخلت صباعها فى عينيه

كشت الام شويه وقالت: طب معلش

طالعه بصوت ضعيف ومن تحت الضرس

الأخ الصغير اللى عنده 6 سنين حضن اخوه الكبير

الأم قالتله: مالكش دعوه بيه.. سيبه

الولد ساب اخوه بخوف وحاول يمسح الدموع اللى غرقت وش اخوه

الأم قالتله: شكلك عاوز تنضرب انت كمان.. باقولك مالكش دعوه بيه

أسمع برطمة كلام من الأم وهى بتكلم الطفل الكبير الباكي مافهمتش منها إلا: انت اصلا مش فارق معايا

الولد الكبير يبطل بكا ويقعد هادى منكسر

الولد الصغير حط ايده على ظهر اخوه وطبطب عليه

راحت الام جابداه من دراعه ووقفته الناحية التانيه.. خليك واقف بقى

طلعت لبان من شنطتي.. واديت واحده للصغير اللى وقف جنبي

الولد اتكسف وقالى .. لا والله ماهاينفع

يابنى ما تحلفش بس

رفض مرة واتنين وفى التالته قال: قولى لماما الاول

ابص على الأم اللى اترسمت على وشها ابتسامه من الودن للودن - طب ماهى بتعرف تبتسم زى البنى ادمين اهيه.. كنت فاكره وشها هايشقق - وقالتلى.. هو لو عايز ياخد

آل يعنى ديموقراطية قوى

ومع الحاحي الولد أخد اللبانة

اديت للأخ الكبير واحدة وبرضه تكرر مسلسل الرفض

لكن مع ابتسامتي قبل ياخدها بسرعه

رمى الطفل الصغير الورقة على الارض.. قلتله لأ ماتعملش كده.. لما تبقى معاك ورقة امسكها فى ايدك او حطها فى جيبك لحد ما تلاقى سلة زبالة وترميها

اخدتها منه وحطيتها فى جيب شنطتى

الولد الكبير بصلى وحاول يرمى الورقة من الشباك وكأنه بيقول: انا باسمع الكلام اهوه ومش هارمى على الأرض

تؤ تؤ تؤ.. هاتها

ناولهالي وحطيتها مع ورقة اخوه.. وحسيت انهم فهموا الدرس

وابتسموا برغم التكشيرة اللى رجعت تلزق على وش امهم تانى

شويه كده وراحت فى النوم

لقيت الطفل الكبير شبك صوابعه تانى وقعد يتأملهم وكأنه بيحاول يكتشف ايه المشكله اللى فيهم اللى تخليه يتعرض للعقاب القاسي ده

قربت محطة السيدة زينب.. الاولاد قاموا من اماكنهم عشان يسمحوا لسيدات أكبر سنا انهم يقعدوا

بمنتهى الأدب والهدوء اللى فى الدنيا

ولما جم يمشوا عملولى باى باى بأجمل ابتسامه ممكن تترسم على وش اطفال

حسيتهم ولاد ناس متربيين جدا مع ان منظر امهم ونظافتهم الشخصية يوحي بالعكس

سرحت فى حكايتهم وبجد استغربت

هى التربية عبارة عن أكل وشرب وضرب وبس؟

دول لما يكبروا هايعتمدوا على انفسهم ازاى وكل حركة يحاولوا يستكشفوا بيها حاجه يتبعها عقاب أليم فوري

خلال النصف ساعة اللى قعدتها معاهم سمعت منها كلمات زي: هاموتك من الضرب.. استنى لما ننزل وشوف هايحصلك ايه

اقعد ساكت وإلا هاتتضرب

ضرب ضرب ضرب.. ايه هو فيه ايه

إزاي دى يطلق عليها اسم أم

هى دى انسانه أساسا؟؟

أنا مبسوطة قويييي

الحمد لله

بجد انا اليومين دول عماله بتجيلى اخبار تفتح النفس وترفع المعنويات وتظبط المود

انا مبسوطة جدا جدا جداااااااا



صديق ليا - وبعد طول انتظار - اخيرا بقى أب لبنوتة زي القمر

وصديقة ليا قلبها ارتاح بعد ما اللى هى بتحبه صارحها بحبه ليها هو كمان

وصديق تالت لأول مرة من كتير قوي يكلمنى وهو متفاءل وفرحان ومزأطط ويبعد عن مود الخنقة والاكتئاب اللى ملازمه

وواحد كمان ربنا كرمه اخيرا في شغله وبقى بيتعامل معاملة بنى ادمين فيه وعنده مواعيد حضور وانصراف معقولة

صديقة ربنا كرمها وقدرت تستعيد توازنها النفسي بعد ما تخلصت من كابوس اسمه خطيبها ورمتله دبلته وركزت في دراستها



دا غير طبعا فرحتى الكبيرة جدا بكل حبايبى واصحابي اللى افتكرونى فى عيد ميلادي



جاي على بالي قوي دلوقتى أغنية سلمى الرائعة.. اللي بتقول فيها:

كلها حاجات بسيطة وقد ايه

قد ايه بتفرق معايا قد ايه

زي ايه

زى لما الفرحة تيجي لوحدها

وزي احساس بالرضا

وزي ما احبك كده

وزي دمعة طيبة ارتاح بعدها

وماعرفش ليه

كلها حاجات بسيطة

زي ايه

زي وردة ف عيد ميلادى

وزي يوم بسيط وعادى

عدى لكن مانسيتوش

وكلمة حلوة سمعتها

من قلب حد انا ماعرفوش

وزي ما افضفض معاك بكلمتين

وف وسطهم

اسرح تقولى رحتى فين

وزي غنوة من بعيد

فيها من ريحة بلادي

كلها حاجات بسيطة

ممكن تحمل الاغنيه وتسمعها بصوت سلمى من هنا

انا مبسوطة قوي.. شكرا ليك يارب انك خليت حاجات بسيطة تفرق معانا وتفرحنا كده

دقايق عدت عليا كبرت فيهم سنة؟؟

ياترى ايه اللى اتغير فيا؟؟



والله أنا شايفه ان الانسان كل ما بيكبر كل ما بيهبل

يبقى المحصلة انى عقليا كبرت سنة وروحيا صغرت سنتين



احلامي ايه وطموحات ايه للسنة دى ياترى؟؟

همممممممم



متهيألي انا زي مانا ومافيش جديد

لسه باسعى انى اطور نفسي

عاوزة أشوف الدنيا وردية وهادية وجميلة ومسالمة على قد ما اقدر

نفسي مافيش حاجه تصدمنى



شكرا ليكو لأنكو اصحابي

شكرا للحلوين اللى بيقولولى كل سنة وانا طيبة بقالهم اسبوع فات
شكرا لكل انسان حبنى من قلبة بجد حتى لو مايعرفنيش كويس



كل لحظة وكلكو طيبين.. :)

على نفس المستوى

بصوا كويس على الصوره دى

دققوا...وقولولي ملاحظين ايه؟

ماحدش أخد باله

طب نسهلها شويه.... بصوا كويس على المدارات اللى الكواكب بتدور فيها حوالين الشمس

طبعا مافيش حاجه بالمنظر ده مرسومه حقيقى حوالين الشمس...بس الخطوط دى بتبين شكل المدار اللى الكواكب بتدور فيها

ها... حد أخد باله؟

عفارم عيلكوا...ايوه كده فرحوا قلبى

مدارات كل الكواكب تقريبا على مستوى واحد...وليها نفس الميل

طبعا احنا لو اخدنا ميل مدار الأرض حوالين الشمس بيساوى صفر...هانلاقى ان ميل مدارات بقية الكواكب تقريبا بيساوى صفر

طب دا ليه؟؟

تعالوا نرجع شويه بالزمن... شويه صغيرين خالص

يادوب خمس مليارات من السنين ..اللى هو تقريبا عمر تكون المجموعه الشمسيه...دا معناه ان المجموعه دى لسه فى عز شبابها

المهم

المجموعه دى اتكونت ازاى ومن ايه؟؟

احنا قلنا فى موضوع سابق عن تكون النجوم انها بتتكون فى رحم سديم كونى

Nebula

حاجه كده اشبه بسحابه كونيه... مليانه بمواد وعناصر متخلفه عن انفجار نجم قديم

طبعا مش هاقدر اوصف حجم السحابه دى قد ايه..لكن كفايه انى اقول ان المجموعه الشمسيه دى كلها بكل مافيها من شمس وكواكب وأقمار وكويكبات ومذنبات .. تكونت من جزء منها

حاجه كده على جنب عنى

المهم... زى أى حاجه فى الدنيا ربنا خلقها.. السحابه دى بتدور حوالين محورها فى اتجاه واحد ما بتغيروش

وبمنتهى البساطه... الكواكب اللى فى المجموعه الشمسيه بتدور فى نفس اتجاه دوران السحابه الكونيه الأصلى

سامعه واحد من بعيد بيقول ان كلامى ده غلط

ليه بس كده يابنى؟؟؟

راح جابلى الصوره دى وقالى:

بصى كويس

هاتلاقى ان الكواكب كلها بتدور بنفس درجة الميل حوالين الشمس ...ماعدا بلوتو

يبقى دا معناه حاجه من اتنين

اما ان بلوتو متكون من سديم تانى...ودا شيء مستحيل

واما ان تكون القاعده بتاعت الدوران دى كلها غلط..وكل كوكب فى المجموعه ماشي على مزاجه

همممممممم

بص يابنى... بلوتو دا استثناء من القاعده

لأنه بعيييييييد جدا عن مركز دورانه ( اللى هو الشمس) وبسبب ان جاذبية الشمس مش قادره تحكمه زى اخواته

الواد ياعينى فلت عياره ومشي مع نفسه

والله ليهم حق انهم يطردوه من البيـ... قصدى يستبعدوه ككوكب من المجموعه الشمسيه

دا موضوع طويل فكرونى انى ابقى احكيلكم عليه فى بوست تانى

المهم.. بلوتو والأجرام السماويه اللى اكتشفوها على مسافه ابعد منه...واللى هى برضه مش كواكب

كلها بتسلك نفس السلوك..وزاوية ميل مستوى دورانها عن مستوى الميل القياسي( اللى هو مستوى ميل الأرض) أكبر من الصفر

المذنبات برضه..كأعضاء من عائلة المجموعه الشمسيه ليها سلوك مختلف ومستويات ميل مختلفه

ماتنسوش ان تركيب المذنب وشكله والدوره بتاعته وسرعته كلها عوامل بتأثر تأثير كبير على المدار بتاعه

خلاص ...انا قلت الكلمتين اللى عندى على الموضوع ده؟؟

حد عنده إضافه أو تعليق؟؟

وانا صغيرة

وانا صغيره.. كنت باتعمد أجرى وأضحك كتير.. عشان عارفه انى ف يوم هاحتاج للذكرى دى
***
وانا صغيره.. كنت دايما بامشى على الناحيه اليمين من الرصيف أو جنب الشجر.. يمكن ربنا يكلمنى زى موسى
***
وانا صغيره.. كنت باخاف أبص فى المرايه.. لحسن أشوف وش حد تانى غيرى
***
وانا صغيره.. كنت باكل بإيدى الشمال.. عشان الشيطان كان بيصعب عليا
***
وانا صغيره.. كنت بازعّق للى بيزعقلى.. وباشتم اللى يشتمنى.. وباخاصم اللى بيخاصمنى
***
وانا صغيره.. كنت باعمل سيوف خشب.. ومعامل تجارب.. وبيوت من الطين
***
وانا صغيره.. كنت باستنى تحت المطر.. وباتفرج على النجوم.. وبابص لقرص الشمس .. عشان أشوف هالات ملونه حوالين الدنيا
***
وانا صغيره.. كنت باحلم انى أطير..أشوف العالم من فوق..وأزور اللى بحبهم.. وأسمع اللى بيكرهونى بيقولوا عليا إيه
***
وانا صغيره.. كنت باقول للأعور فى وشه انت أعور
***
وانا صغيره.. كنت بامشى فوق أنبوبة البوتاجاز.. وباتشعبط فوق المواسير.. وبانطّ من البلكونه بفرع نخله.. وباتشقلب فوق السور

***

وانا صغيره.. كانت الشيكولاته والزيتون الأسمر والتفاح الأمريكانى هما غذائى المفضل

***

وانا صغيره.. كنت باحضّر دروسى وباحل والواجب .. وما بافوتش مسابقه ثقافيه أو غير ثقافيه إلا وأشترك فيها.. وما باسيبش نشاط إلأا وأعمله

***

وانا صغيره.. كنت باحلم انى ما أكبرش أبدا

***

وانا صغيره.. كنت باحب أروح المستشفى وآخد الأدويه.. وياريت لو كانت حقن

***

وانا صغيره..كنت حافظه جزئين أو تلاته من القرآن.. غير الأحاديث والأدعيه

***

وانا صغيره.. كنت باحب أتفرج على الإعلانات.. وباكره المسلسلات ونشرات الأخبار

***

وانا صغيره.. كنت مربربه ودبدوبه وباكل 7 طقات فى اليوم

***

وانا صغيره.. كنت باتمنى لو حطيت روج وفكيت ضفايري ولعبت كوره فى الشارع مع الأطفال

***

وانا صغيره.. كنت باتمنى لو لقيت صديقه تشبهنى وتكون نسخه منى 100% عشان تفهمنى

***

وانا صغيره..كنت باعمل كل حاجه .. ماقدرش أعملها وانا كبيره

 

ادعوا معايا

تحديث

الحمد لله

يارب لك الحمد كما ينبغي لجلالك وعظيم سلطانك

اللهم لك الحمد والشكر

حمدا كثيرا طيبا مباركا فيه

اللهم ما أصبح وأمسى بي من نعمة أو باحد من خلقك فمنك وحدك لا شريك لك

فلك الحمد ولك الشكر

أنا بحبك قوى يارب

****

يااااااااااارب

عمري ماحسيت بطعم كلمة على لسانى أحلى منها

ماليش غيرك يارب يعرف اللى فى قلبي واللي بتمناه مهما عبرت عنه بالكلام

ياااااااااااااااااااااارب

انت اللى عالم بالسر وبالعلن

انت اللى خلقتنا .. وانت اللي رسمتلنا سيناريو حياتنا

احنا ما بنعترضش على ادوارنا يارب.. بس بنتمنى ان الجاي يبقى احلى

يااااااااااااااااارب

حكمتك فاقت كل شيء.. وكل اللى بيحصلنا في حياتنا هو احسن حاجه لينا

يارب ارجوك.. انت الاعلم بحالي والأعلم بطلبي

أرجوك يارب وفقني لطلبي.. وانت الاعلم انه مش علشانى يارب

دى دعوة لانسان مكروب بظهر غيب.. يارب تفرج عنه كربه

يارب.. انت العدل والعدل اسمك وصفتك

يارب رجائي العدل.. وأسبغ عليه من رحمتك

يارب أرجوك.. ساعدني ان دعوتي دى تكون خالصه ليك انت لوحدك

ويشاركني فيها كل الناس

أرجوك يارب.. فرج عن مكروبي كربته.. ساعده ووفقه وارحمه

هو محتاجلك قوى يارب الدقايق الجايه زي ماكلنا محتاجينلك من قبل ما نشوف الدنيا دى

ياااااااااااااااااااااااااااااااااااارب